کابل ښوونې او روزنې پوهنتون د علمي چارو مرستيال د کمپيوټر ساينس پوهنځي له استادانو سره ناسته ترسره کړه!
چهارشنبې ورځ د ١٠/١٠/١٤٠٤ ه.ش چې ٧/١٤٤٧/ ١٠ هـ.ق نېټې سره سمون لري د کابل ښوونې او روزنې پوهنتون د علمي چارو مرستيال د کمپيوټر ساينس پوهنځي له استادانو سره ناسته ترسره کړه.
په دې ناسته کې د پوهنځي د علمي وضعيت ارزونه وشوه او د علمي همکاريو پراختيا، د تدريسي بهير د پياوړتيا او د استادانو ترمنځ د تجربو د شريکولو پر ارزښت خبرې وشوې.
د کابل ښوونې او روزنې پوهنتون علمي چارو مرستیال ښاغلي مولوي احسان الله "ناصح" ګډونوالو ته په خپلو خبرو کې د ښه راغلاست ترڅنګ د فوق لېسانس (ماسټرۍ) برنامې کيفيت لوړولو، د درسي نصاب معياري کولو او د محصلينو علمي ظرفيت لوړولو اړوند هراړخیزې خبرې وکړې، زیاته یې کړه: د کيفيت لوړاوي د ارزونې بهير ته په کتو، د اړينو اسنادو برابرولو، د تدريسي معيارونو پوره کولو او د ارزونې لپاره د بشپړ چمتووالي لپاره باید اړین کارونه ترسره شي.
په پای کې استادانو خپلې نظريې، ستونزې او وړانديزونه شريک کړل او د علمي چارو مرستيال د علمي پرمختګ، د کيفيت د دوامداره ښه والي او د ګډې همکارۍ ډاډ ورکړ.
غونډه د دعایې په ویلو سره پای ته ورسېده
