لوړو زده کړو وزارت له لوري د کابل ښوونې او روزنې پوهنتون د کیفیت لوړاوي درېمیې مرحلې د سندونو د ساتنې ارزونه پیل شوه!
٢٠/٨/١٤٤٧، یکشنبه
د کابل ښوونې او روزنې پوهنتون د علمي، خدمتي، څېړنیزو او اداري سیستمونو د کیفیت یقیني کولو په موخه، د لوړو زده کړو له لوري د کیفیت لوړاوي پروسې درېیمې مرحلې سندونو حفظ(ساتلو) ارزونه پیل شوه.
یاده پروسه د پوهنتون اکادمیکو معیارونو، تحصیلي فعالیتونو او اداري چارو د سمون او پرمختګ لپاره خورا مهمه ده، د ارزونې په مقدماتي غونډه کې یې د کابل ښوونې او روزنې پوهنتون رئیس ښاغلي مولوي عبدالحکیم حمدي له لوړو زده کړو وزارت څخه راغلي پلاوي ته د ښه راغلاست تر څنګ، د یادې ارزونې اړوند خوښي څرګنده کړه او ویې ویل: په تحصیلاتي سیسټم کې د کیفیت لوړاوي ارزونې پروسه به وکولی شي، چې د زده کړیز سیسټم ستونزې په ډاګه، ورته حل لارې پیدا کړي او په ټوله کې د یاد سیسټم د ارتقا او مؤثریت سبب به شي.
ورپسې، د علمي چارو مرستیال مولوي احسان الله ناصح د غونډې ګډونوالو ته د د پوهنتون د موقیعت، زېربناوو، مخینې، ماموریت، ارزښتونو، لاسته راوړنو، اداري تشکیل، دوکتورا، ماسټري او لیسانس برنامو، استادانو او محصلینو اړوند خلص معلومات وړاندې کړل.
همدارنګه، د ارزونې پلاوي په استازولي دوکتور ضیاءالدین عظیمي خپلو خبرو کې یاد پوهنتون ته له راتګ څخه خوښي څرګنده کړه، ویې ویل: د ارزونې هدف ازموینه نه؛ بلکې د پوهنتون د هراړخیز کیفیت لوړولو ګډه هڅه ده او هیله لرو چې کابل ښوونې او روزنې پوهنتون د مخکې په څېر تل تحصیلي ډګر کې بریالی پوهنتون ثابت شي.
یاده ارزونه کې به اکادمیک معیارونه، اداري جوړښت او مدیریت، د زده کوونکو او استادانو ګډون، بهرني معیارونه او نوښتونه وارزول شي چې د دې ارزونې له لارې پوهنتون ته د لا ښه کیفیت لرونکو زده کړو، موثر مدیریت، او د نړیوالو معیارونو سره سمون لپاره لارښوونې وړاندې شي، چې پوهنتون خپلې اکادمیکي او اداري کچې لا لوړې کړي او زده کوونکو ته د علم او مهارتونو لوړ کیفیت یقیني کړي.
