کابل ښوونې او روزنې پوهنتون د استادانو ستاینغونډه ترسره شوه!

چهارشنبه-  ٢١،٢،١٤٤٨ه.ق
کابل ښوونې او روزنې پوهنتون د علمي چارو معاونیت اړوند د استادانو مسلکي پراختیا امریت له لوري د ١٤٠٤ کال، ٦٠ برنامو وړاندې کوونکي او ګډونوال استادان د ستاینلیکونو او تصدیق پاڼو پر ورکړې سره وستایل.

ستاینغونډه د عبدالرحمن بن سمرة رضی الله عنه د غونډو په عمومي تالار کې جوړه شوې وه او په ترڅ کې یې د ٦٠ برنامو وړاندې کوونکواو  ګډونوالو استادانو ته ٧٣٤ ستاینلیکونه او تصدیق پاڼې د پوهنتون معاونینو، پوهنځیو رئیسانو، څانګو امرینو او اداري کارمندانو په حضور کې  وویشل شوې.

د غونډې په پیل کې، علمي مرستیال مولوي احسان الله ناصح مقدماتي وینا ترڅنګ یې د غونډې پر ارزښت خبرې وکړې، زیاته یې کړه د استادانو مسلکي پراختیا امریت تېرکال زیاتې لاسته راوړنې درلودې، هیله مند یو روان کال هم خپلو هڅو ته دوام ورکړي.

ورپسې، د استادانو مسلکي پراختیا امر پوهنوال دوکتور عبدالجبار څپاند د یاد امریت د تېر کال ګزارش له ګډونوالو سره شریک کړ.

همدارنګه، د اسلامي علومو پوهنځي رئیس شیخ عبدالمعید ابوالجراد د دې برنامو د ارزونې اړوند هراړخیزې خبرې وکړې.

وروسته له مقدماتي خبرو، استادانو ته ستاینلیکونه او تصدیق پاڼې وویشل شوې.

د نشراتو او عامه اړیکو امریت