د لوړو زده کړو وزارت مشرتابه پلاوي، د مرکزي پوهنتونونو یوشمېر استادانو او د لوړو زده کړو وزارت ځینو کارکوونکو ته نن یاد وزارت کې د کورونا ویروس ضد واکسین تطبیق شو.
د لوړو زده کړو وزیر په دې اړه جوړه شوې ناسته کې؛ په داسې حال کې چې د دغه وزارت مرستیالانو، یوشمېر رییسانو او د عامې روغتیا وزارت مسوولینو ګډون لاره؛ د واکسین د تطبیق په برخه د عامې روغتیا وزارت له همکارۍ څخه په مننې سره وویل چې دا لړۍ به د هیواد ټولو پوهنتونونو ته وغځوي.
د لوړو زده کړو وزیر وویل چې د هیواد ټولو تحصیلي بنسټونو د استادانو واکسینول د یاد وزارت له لومړیتونو څخه دی او هڅه به یې دا وي چې دا واکسین ان زدکړیالانو ته هم ورسېږي.
له دې سره د عامې روغتیا وزارت مسوولینو هم وویل چې دوی به لومړی هغو کسانو ته د کورونا ویروس ضد واکسین تطبیق کړي چې له دغه ویروس سره د مبارزې په لومړۍ کرښه کې وو.
