کابل ښوونې او روزنې پوهنتون ١٤٠٣کال نويو کامیاب شویو محصلینو ته د ښه راغلاست غونډه ترسره کړه!

 یکشنبې ورځ د ١٢/٣/١٤٤٦ ه.ق. چې له ۲۵/٦/١٤٠٣ ه.ش. نېټې سره سمون لري د کابل ښوونې او روزنې پوهنتون د ١٤٠٣کال هغه محصلینو ته چې د پوهنتون بېلابېلو پوهنځیو ته نوي بریالي شوي دي، د ښه راغلاست غونډه ترسره شوه.

په یاده غونډه کې د لوړو زده کړو وزارت وزیر، مالي اداري چارو معین، رئیسانو، کابل ښوونې او روزنې پوهنتون رئیس،معاونینو، د پوهنځیو رئیسانو، اداري آمرینو، استادانو او محصلینو ګډون درلود.

لومړۍ، د کابل ښوونې او روزنې پوهنتون رئیس ښاغلي شیخ الحدیث سید بشیر آغا "هاشمي" محصلینو ته د مبارکۍ تر څنګ، له استادانو او کورنۍ سره د ښو اخلاقو، مسلکي زده کړو، د عصری زده کړو تر څنګ د دیني زده کړو، له کتابتون او لابرتوارو څخه د ګټه اخیستلو او د پوهنتون اصولو او قوانینو مطابق د درسونو مخته وړلو اړوند اړینې سپارېښتنې وکړې.

وروسته، د لوړو زده کړو وزارت سرپرست وزیر ښاغلي شیخ الحدیث مولوي نداء محمد"ندیم" صاحب نويو کامیاب شویو محصلینو ته د ښه راغلاست تر څنک، محصلینو ته وویل تاسو د هېواد راتلوونکي یاستئ، خپلې زده کړې په منظمه توګه مخته یوسئ او کوښښ وکړئ وروسته له څلورو کالو تحصیلي دورې د لوی علم او شخصیت خاوندان شئ.

همدارنګه، د لوړو زده کړو وزارت مالي او اداري چارو معین ښاغلي حافظ حسیب"حامد" محصلینو ته د مبارکۍ تر څنګ د علم ارزښت اړوند هراړخیزې ویناوې وکړې.

د غونډې په جریان کې د وزارت بېلابېلو ریاستونو رئیسانو او د پوهنتون علمي چارو معاون لخوا د څلور کلنې تحصیلي دورې اړوند هراړخیزې خبرې وشوې

د غونډې په پای کې هغه محصلین چې نه ګوني پوهنځیو ته په لوړو نمرو کامیاب شوي ول د ستاینلیکونو په ورکړې سره ونازول شول.

غونډه د دعایې په ویلو سره پای ته ورسېده.