کابل ښوونې او روزنې پوهنتون له البیروني پوهنتون سره د همکارۍ هوکړه وکړه!
شنبه- ٢٧،١٢،١٤٤٧ ه.ق
د اکاډمیکو او علمي مرکزونو د پیاوړتیا په موخه د کابل ښوونې او روزنې پوهنتون او کاپیسا البیروني پوهنتون ترمنځ په علمي، څېړنیزو او اداري ډګرونو کې د همکارۍ، نصاب جوړونې او بیاکتنې برخه کې د ګډ کار، سمینارونو، ورکشاپونو او کنفرانسونو دایرولو، په مجلو او ژورنالونو کې د مقالو نشرولو، څېړنیزو پروژو ترسره کولو، محصلینو ته د زدکړیزو برنامو جوړولو، منابعو تبادلې او د علمي کادرونو او اداري کارمندانو ظرفیت لوړولو په برخو کې د ګډ کار هوکړه لیک لاسلیک شو.
یاد هوکړه لیک چې په ١٠ مادو کې ترتیب شوی و، په کابل ښوونې او روزنې پوهنتون کې د یاد پوهنتون د رئیس مولوي عبدالحکیم حمدي او کاپیسا البیروني پوهنتون رئیس مولوي سید بشیرآغا هاشمي ترمنځ د دواړو پوهنتونونو د یو شمېر مسؤلینو او استادانو په حضور کې لاسلیک شو.
د دې هوکړه د لاسلیک پر مهال د کابل ښوونې او روزنې پوهنتون مسؤلینو د هوکړه لیک اړوند مادو د عملي تطبیق په برخه ټینګار وکړ او څرګنده یې کړه، چې داسې هوکړې د علمي مرکزونو د تقویت او له یو بله د الهام اخیستنې باعث کېږي.
اطلاعاتو، نشراتو او عامه اړیکو امریت
