کابل ښوونې او روزنې پوهنتون استادانو ته یو ورځنی ښوونیز- لارښودي ورکشاپ وړاندې شو!
پنجشنبه، ۱۴۴۷،۹،۲ هـ.ق
د کابل ښوونې او روزنې پوهنتون، علمي چارو معاونیت اړوند د استادانو مسلکي پراختیا آمریت له لوري د پوهنتون استادانو ته “د مقدمې لیکلو تګلاره: مسالې طرحه، هدف، اهمیت او ضرورت" ترسرلیک لاندې یو ورځنی ورکشاپ د علمي چارو مرستیال، د استادانو مسلکي پراختیا آمر، مسلکي پراختیا مسؤولینو او استادانو په ګډون کې وړاندې شو.
د ورکشاپ په پیل کې له تلاوت وروسته د علمي چارو مرستیال مولوي احسان الله ناصح د ورکشاپ مقدماتي وینا وکړه، نوموړي خپلو خبرو کې د علمي لیکنې پر ارزښت او د معیاري مقدمې پر اړتیا ټینګار وکړ. نوموړي وویل: د هرې علمي څېړنې بنسټ په قوي او منظمې مقدمې ولاړ وي، او که مقدمه په سمه توګه ترتیب شي، نو د څېړنې نورې برخې هم په اسانه او معیاري ډول پر مخ ځي.
ورپسې د استادانو مسلکي پراختیا آمر پوهنوال دوکتور عبدالجبار څپاند د غونډې ګډونوالو ته د ورکشاپ د موخو اړوند معلومات ورکړل، ده وویل: دغه پروګرام د علمي پرمختګ او د معیاري لیکنې د ترویج په موخه یو اغېزمن ګام دی.
وروسته یاد ورکشاپ د پوهنمل دوکتور سیدعلی اقبال له خوا رسماً پیل او له ګډونوالو سره د مسئلې طرحه او سم بیان، څېړنې هدف ټاکنه، موضوع اهمیت او ضرورت څرګندول، علمي اصولو مراعات او معیاري لیکدود اړوند یې هراړخیز معلومات شریک کړل.
د اطلاعاتو، نشراتو او عامه اړیکو امریت
