کابل ښوونې او روزنې پوهنتون د کمپیوټر ساینس پوهنځي لخوا د یاد پوهنځي محصلینو ته د "آنلاین شغلي مهارتونو" ښوونیز پروګرام افتتاح شو!
سې شنبې ورځ د ٨/٣/١٤٠٣ ه.ش چې له ٢٠/١١/۱۴۵۵ ه.ق نېټې سره سمون لري د پوهنتون رئیس، د کمپیوټر پوهنځي رئیس، استادانو او محصلینو په ګډون د کمپیوټر ساینس پوهنځي لخوا محصلینو ته د "آنلاین شغلي مهارتونو" ښوونیز پروګرام افتتاح وشوه.
افتتاحیې غونډه د قرانکریم د څو مبارکو آیاتونو په تلاوت سره پیل شوه.
په پیل کې، د پوهنتون رئیس ښاغلي شیخ الحدیث سید بشیر آغا "هاشمي" په خپلو خبرو کې د کمپیوټر ساینس له پوهنځي مننه وکړه، چې محصلینو ته یې یاد ښوونیز پروګرام پیل کړو، زیاته یې کړه چې یادې د آنلاین مهارتونو برنامې په اوسنیو شرایطو کې محصلینو لپاره ډېرې ګټورې دي او محصلین باید له وخت څخه په ګټه اخیستنې سره له یادو کورسونو پوره ګټه واخلي.
وروسته، د کمپیوټر ساینس پوهنځي رئیس ښاغلي پوهنوال قربان علي"فروغ" د یادې برنامې اړوند معلومات ورکړل، زیاته یې کړه: د دې برنامې اصلي هدف، محصلینو لپاره په آنلاین برخه کې د شغلي مهارتونو زده کول دی.
یاده ښوونیز پروګرام چې د کمپیوټر ساینس پوهنځي استادانو لخوا پرمخ وړل کیږي یو اوونۍ به دوام وکړي.
