کابل ښوونې او روزنې پوهنتون رئیس له هغو استادانو سره چې له بېلابېلو ولایتونو راغلي او پوهنتون کې لیلې ژوند لري، غونډه ترسره کړه!
چهارشنبې ورځ د ١٤٠٤/٦/٢٦ه.ش چې له ١٤٤٧/٣/٢٤ه.ق نېټې سره سمون لري د کابل ښوونې او روزنې پوهنتون رئیس ښاغلي شیخ الحدیث سید بشیرآغا"هاشمي" له هغو استادانو سره ځانګړې غونډه وکړه چې له بېلابېلو ولایتونو راغلي او په پوهنتون کې د لیلې ژوند لري، غونډه ترسره کړه. په دې ناسته کې استادانو خپلې غوښتنې، نظریات او ستونزې په تفصیل سره وړاندې کړې.
یاده غونډه کې استادانو د استوګنې د اسانتیاوو ښهوالي، په لیله کې د ژوند د شرایطو سمون، د څېړنیزو منابعو ته د لا ښه لاسرسي برابرول، او د مسلکي ظرفیتونو د لوړولو لپاره د فرصتونو رامنځته کولو اړوند خپل نظریات وړاندې کړل. استادانو ټینګار وکړ چې د لیلې چاپېریال د هغوی د علمي تمرکز لپاره ګټور دی، خو د ځینو نیمګړتیاوو له امله د رهبري ځانګړې پاملرنې ته اړتیا لري.
د کابل ښوونې او روزنې پوهنتون رئیس ښاغلي شیخ الحدیث سیدبشیرآغا"هاشمي" د استادانو خبرې په پوره دقت واورېدې او د هغوی د زحمتونو او علمي خدمتونو ستاینه یې وکړه. نوموړي ډاډ ورکړ چې د پوهنتون رهبري به د لوړو زده کړو وزارت په همکارۍ د ستونزو د حل او غوښتنو د پلي کېدو لپاره عملي ګامونه پورته کړي.
هغه زیاته کړه چې استادان د هېواد د علمي پانګې حیثیت لري او د ځوان نسل د روزنې په بهیر کې مخکښ رول لري، نو د هغوی اړتیاوو ته پاملرنه د پوهنتون د کار له لومړیتوبونو څخه ده.
