د ټولنیزې مرستې د څانګې جوړولو لپاره د چمتووالي دفتر پرانیستل شو
د ۱۴۰۰ کال د غوايي میاشتې په اوومه نېټه د ارواپوهنې پوهنځي، د JRS مؤسسې په تخنیکي همکارۍ او د افغانستان لپاره د ناروې کمېټې په (۴۱۴۶ امریکايي ډالرو) مالي مرسته چې (۳۲۲۵۵۸) افغانۍ کېږي، د دفتر اجناس چمتو شول او د ارواپوهنې پوهنځي په چوکاټ کې د ټولنیزې مرستې څانګې جوړولو ته وسپارل شول. په دغه پروګرام کې د شهید استاد رباني د ښوونې او روزنې پوهنتون رئیس آغلې پوهنوال لیلما شریفي یما، علمي مرستیال ښاغلي پوهاند جمشېدخان رشیدي، اداري مرستیال ښاغلي پوهندوی عبدالخالق حیدري او د ارواپوهنې پوهنځي رئیس پوهنوال زهرې ولید رحماني ګډون کړی و. همدا راز د افغانستان لپاره د ناروې کمېټې لهخوا آغلې میریم دونانت سجورتن او آغلې پروین عظیمي، د JRS مؤسسې لهخوا د افغانستان د کچې عمومي رئیس ښاغلي جیورم سیکورا او د پروژې رئیس ښاغلي سندیش، آغلې شریفې بهزاد او ښاغلي فهیم اربابخېل ګډون کړی و. په دې ناسته کې د JRS مؤسسې او د افغانستان لپاره د ناروې کمېټې پر ګډو همکاریو خبرې وشوې او دوی د شهید استاد رباني د ښوونې او روزنې پوهنتون د اختصاصي زدهکړو او روزنیزو او مسلکي علومو له پوهنځيو سره د همکارۍ وعده وکړه.
په پای کې د پوهنتون مشرتابه پلاوي د (JRS) مؤسسې او ناروې کمېټې دوو مسؤولینو ته مننلیکونه ورکړل او د ټولنیزو مرستندویانو د څانګې جوړولو لپاره د چمتووالي دفتر د پوهنتون د مشرتابه پلاوي او یادو ادارو د استازو لهخوا رسماً پرانیستل شو او ګټې اخیستنې ته وسپارل شو.
