کابل ښوونې او روزنې پوهنتون د طبیعي علومو پوهنځي د استادانو او کارمندانو له علمي، څېړنیزو او اداري فعالیتونو څخه د منندویۍ غونډه ترسره شوه!
دوشنبې ورځ د ٢٩/١٠/١٤٠٤ ه.ش چې له ٢٩/٧/١٤٤٧ ه.ق نېټې سره سمون لري د کابل ښوونې او روزنې پوهنتون د طبیعي علومو پوهنځي د استادانو او کارمندانو له علمي، څېړنیزو او اداري فعالیتونو څخه د منندویۍ غونډه ترسره شوه.
یاده غونډه د کابل ښوونې او روزنې پوهنتون د طبیعي علومو پوهنځي لهخوا د یاد پوهنځي استادانو او اداري کارمندانو د علمي، څېړنیزو او اداري لاسته راوړنو او نه ستړې کېدونکو هلو ځلو په پار د قدردانۍ او منندویۍ ترسره شوه.
غونډه د قرانکریم د مبارکو آیتونو په تلاوت سره پیل شوه.
په پیل کې، د طبیعي علومو پوهنځي رئیس ښاغلي پوهندوی محمد فاروق "حکیمي" مقدماتي وینا وکړه او په خپلو خبرو کې یې د استادانو او کارمندانو له ژمنو، هڅو او مسؤلیتپالنې څخه مننه وکړه او ویې ویل: طبیعي علومو پوهنځی د خپلو علمي کادرونو، څېړونکو استادانو او اداري کارمندانو په فعالیتونو پر مټ توانیدلی چې روان کال په علمي، څېړنیزو او تدریسي برخو کې د پام وړ پرمختګونه ولري. نوموړي زیاته کړه: د پوهنځي استادانو نه یوازې د تدریس په برخه کې خپل مسؤلیت په ښه توګه اداء کړی، بلکې د علمي څېړنو، سیمینارونو، کنفرانسونو او علمي مقالو د لیکلو له لارې یې د پوهنتون علمي اعتبار نور هم لوړ کړی دی. همدارنګه یې د اداري کارمندانو له منظم کار، همغږۍ او همکارۍ ستاینه وکړه او ویې ویل چې د اداري سیسټم بریا د همدغو هڅاندو کارمندانو له برکته ممکنه شوې ده.
وروسته، د علمي چارو مرستیال ښاغلي مولوي احسان الله"ناصح" خپلو خبرو کې وویل: د طبیعي علومو پوهنځی د پوهنتون له فعالو او مخکښو پوهنځیو څخه شمېرل کېږي. علمي پرمختګ، معیاري تدریس او مؤثره څېړنه هغه درې مهم اصلونه دي چې د طبیعي علومو پوهنځي استادانو پرې په پوره اخلاص کار کړی دی. نوموړي د ځوانو استادانو علمي ودې، د څېړنیزو پروژو پراختیا او د محصلینو د علمي وړتیاوو لوړولو په برخه کې د پوهنځي هڅې وستایلې او ټینګار یې وکړ چې رهبري به تل د علمي کادرونو ملاتړ ته دوام ورکوي.
د غونډې په جریان کې د طبیعي علومو پوهنځي استادان او کارمندان د ستاینلیکونو پر ورکړې سره وستایل شول.
