د علمي څېړنو مرکز د کمېټې نوبتي ناسته
د پوهنتون د علمي څېړنو مرکز د روان کال د غبرګولې میاشتې په ۳مه نېټه د دوشنبې په ورځ نوبتي ناسته وکړه چې د علمي څېړنو د مرکز آمرې آغلې پوهنیار نرګس ستانکزۍ او د دغه مرکز غړو ګډون پکې کړی و. په دې ناسته کې پر لاندې موضوعاتو بحث او لازمې پرېکړې وشوې.
• په ناسته کې د استادانو شپږ علمي آثار او د مرکز او ولایاتو د پوهنتونونو د استادانو د موضوع ټاکلو وړاندیزونه د کتنې او نظر څرګندولو لپاره د علمي څېړنو د مرکز غړو ته وسپارل شول.
• د مرکز او ولایاتو د پوهنتونونو د استادانو د علمي کنفرانسونو موضوعات د لومړي فیډبک تر اخیستو او دویم ځلي اصلاح وروسته د کتنې او فیډبک څرګندولو لپاره د مرکز غړو ته وسپارل شول.
• د استادانو د ۱۴۰۰ کال د لومړۍ ربعې د علمي کنفرانسونو د ترسره کېدو پر نېټه بحث وشو. په بحث کې پرېکړه وشوه چې د استادانو علمي کنفرانسونه به د روان کال د غبرګولې میاشتې په ۲۴مه نېټه پیل او درې ورځې به په بېلابېلو حوزو کې ترسره شي.
• په پای کې له هغو بنسټونو او علمي ادارو سره د هوکړهلیکونو پر امضا کولو بحث وشو چې له علمي څېړنو سره مرسته وکړای شي.
