کابل ښوونې او روزنې پوهنتون رئیس ښاغلي شیخ الحدیث مولوي سید بشیر آغا هاشمي د اسلامي علومو پوهنځي استادانو سره ولیدل!
چهارشنبې ورځ د (1402/6/29) هـ.ش چې له (1445/3/4) هـ.ق نېټې سره سمون لري د کابل ښوونې او روزنې پوهنتون رئیس د اسلامي علومو پوهنځي له استادانو سره لیدنه وکړه.
غونډه د قرانکریم د څو مبارکو آیاتونو په تلاوت سره پیل شوه. په یاده غونډه کې د پوهنتون رئیس، علمي چارو مرستیال، د اسلامي علومو پوهنځي رئیس او استادانو ګډون درلود.
د کابل ښوونې او روزنې پوهنتون رئیس ښاغلي شیخ الحدیث مولوي سید بشیر آغا هاشمي په خپلو خبرو کې وویل: چې یاده غونډه له استادانو سره د ښو درسي میتودونو عملي کولو په پار نیول شوې ده.
زیاته یې کړه: محترمو استادانو د محصلینو روزل او تربیه ستاسو په لاس کې ده او د ښې روزنې راتلونکې روښانه وي، خپلو مسؤولیتونو ته متوجه شئ او د پوهنتون اصولو او قوانینو ته په کتو خپلې تدریسي چارې پر مخ یوسئ.
همدارنګه ښاغلي هاشمي د یادې پوهنځي استادانو ته د نوي تدریسي میتودونو، په کارونو کې ریښتینوالي، محصلینو سره ښه سلوک او رفتار او د محصلینو فکري او اصلاحي روزنې په برخو کې اړینې سپارښتنې وکړې.
د غونډې په پای کې ښاغلي هاشمي د استادانو د نظرونو او وړاندیزونو آورېدولو وروسته یې د هغو په عملي کولو تعهد او ټينګار وکړ.
غونډه د دعایې په ویلو سره پای ته ورسېده.
