۱۴۰۰ کال، د زمري ۴مه، لوړو زده کړو وزارت
د هېواد ټولو دولتي او خصوصي پوهنتونو کې د کورونا ویروس واکسین تطبیق پروسې په اړه لوړو زده کړو وزارت کې ناسته وشوه.
دغه ناسته کې د لوړو زده کړو وزارت د دولتي محصلانو رییس پوهنوال انجنیر محمد شریف امین، د خصوصي محصلانو رییس پوهندوی دوکتور خیبر سیفي، د نشرانو او عامه اړیکو سرپرست رییس او د وزارت ویاند پوهنیار حامد عبیدي، د عامې روغتیا وزارت د واکسین بهیر سلاکار ډاکټر احمد ناصر واثق او د مرکزي پوهنتونونو مرستیالانو؛ د کورونا واکسین د تطبیق پر بهیر خبرې وکړې.
د مرکزي پوهنتونونو مرستیالانو د ناستې ګډونوالو ته په یادو پوهنتونونو کې د واکسین بهیر د پیل په اړه معلومات ورکړل او زیاته یې کړه؛ چې دا پروسه دې لاچټکه شي.
د لوړو زده کړو وزارت د دولتي محصلانو رییس وویل چې تر راتلونکو دوه اونیو پورې به په ټولو دولتي پوهنتونونو کې محصلین واکسین شي.
د لوړو زده کړو وزارت ویاند او د نشراتو سرپرست رییس هم وویل چې د اړوندې برخې کاري ټیمونه هڅه کوي څو د ټولو پوهنتونونو کارکوونکي او محصلین واکسین شي. نوموړي زیاته کړه چې د واکسین تطبیق په موخه به د عامې روغتیا وزارت او ټولو دولتي او خصوصي پوهنتونونو سره همغږي لاچټکه کړي.
په ورته وخت کې د عامې روغتیا وزارت استازي هم ډاډ ورکړ چې دوی خورا ډېر واکسین لري او کولای شي تر راتلونکو لس ورځو په ټول هېواد کې د پوهنتونونو استادان، کارکوونکي او محصلین واکسین کړي.
د عامې روغتیا وزارت استازي زیاته کړه؛ هغه محصلین چې اوسمهال په ولایتونو کې دي، کولای شي په اړوندو ولایتونو کې واکسین ترلاسه کړي او پاتې نور به مرکز ته تر راستنېدو وروسته واکسین شي.
دا په داسې حال کې ده چې د لوړو زده کړو وزارت پرېکړې پر بنسټ ټاکل شوې د هېواد په هغو ولایتونو کې چې د کورونا ګواښ تر ۳۵ سلنې کم دی، د زمري میاشتې په ۱۶مه به حضوري درسونه پیل شي.
