د اسلامي علومو د پوهنځي استادانو ته د نړیوالو ژورنالونو د ور پېژندلو علمي سیمینار
د کابل د ښوونې او روزنې پوهنتون د مسلکي پراختیا مرکز د خپل جوړښت بنسټیزې موخې ته په کتو سره د پوهنتون د استادانو او اداري کارکوونکو د مسلکي پوهې د لوړولو لپاره د علمي پروګرامونو جوړولو ته ژمن دی. له همدې امله یې د اسلامي علومو د پوهنځي استادانو ته د نړیوالو ژورنالونو د ور پېژندلو تر سرلیک لاندې د شنبې په ورځ د ۱۴۰۰ کال د سلواغې په ۹ نېټه علمي سیمینار جوړ کړ.
سیمینار د قرآنکریم د څو مبارکو آیتونو په تلاوت سره پیل شو. ورپسې د پوهنتون د علمي چارو مرستیال ښاغلي پوهاند جمشېدخان رشیدي د لارښوونو تر څنګ د نړیوالو باوري ژورنالونو د مقالو پر اهمیت خبرې وکړې او له استادانو یې وغوښتل چې په دې برخه کې پوره هڅه وکړي تر څو شته ستونزې مو حل شي. وروسته د پوهنتون د مسلکي پراختیا آمر ښاغلي پوهنوال همایون غفوري د اسانچاري په توګه پاتې سیمینار مخته یووړ او پر لاندې مسائلو بحث وشو:
۱. د بېلابېلو ژورنالونو پېژندنه؛
۲. د ژورنالونو جوړښت؛
۳. د نړیوالو باوري او ناباوري ژورنالونو پېژندنه؛
۴. د باوري ژورنالونو د ثبت د ډېټابېسونو پېژندنه.
سیمینار په پوښتنو او مناسبو ځوابونو سره پای ته ورسېد.
