د شهید اونۍ لمانځل
د ۱۳۹۹ کال د یکشنبې په ورځ د وږي په ۲۳ مه، د شهید اونۍ د لمانځلو او ملي اتل احمدشاه مسعود د نولسمې کلیزې لمانځلو مراسم د شهید استاد رباني د ښوونې او روزنې پوهنتون په عمومي تالار کې ترسره شو.
په دې مراسمو کې ، د ملي اتل د بنسټ رییس ښاغلي احمد ولی مسعود ، د ملي پخلاینې شورا مرستیال ښاغلي عطاء الرحمن سلیم ، د مشرانو جرګې سلاکار ښاغلي مولوي عبد الخلیل ، د بهرنیو چارو وزارت د ډیپلوماټ ښاغلي سید نبی نبیل ، مشهور ژورنالست ښاغلي محمد فهیم دشتي، شاعر او لیکوال ښاغلي ګل پاچا بینا، د ټولنپوهنې د څانګې استاد پوهنمل ډاکټر ذبیح الله اسدي ، د مالي او اداري چارو مرستیال پوهندوي عبدالخالق حیدري، د اسلامي زده کړو د پوهنځي رییس پوهنیار سید هاشم امین ، استادانو، اداری کارکوونکو، میلمنو او زده کونکو ګدون درلود.
مراسم د خدای تعالی د کلام په تلاوت سره پیل شو، د ملي سرود له خپرولو وروسته ښاغلي ډاکټر ذبیح الله اسدي، د راغلو میلمنو هرکلی وکړ او د ملي اتل احمدشاه مسعود د زړورتیا، مېړانۍ او اتلولۍ په اړه یې خبرې وکړې. وروسته د ښاغلي پوهنیارسید هاشم امین، د پوهنتون مشرتابه په استازیتوب خبرې وکړې او د خپلې وینا په جریان کې یې د ملي اتل ښه چلند او کړنې په ګوته کړې او هغه یې د وطن دوسته او خپلواکۍ غوښتونکی انسان وباله. ورپسې ښاغلي عبدالحبیب عیار، د شهید استاد رباني د ښوونې او روزنې پوهنتون د محصلینو په استازیتوب خبرې وکړې او د ملي اتل احمدشاه مسعود یوه نوې مقاله یي ولوستله، چې په دې وروستیو کې د ملي اتل د بنسټ له خوا خپره شوې او برخه والو ته یې وړاندې کړئ. له هغه نه وروسته ښاغلي محمد فهیم دشتي د خپل ژوند ځینې یادونه یاد کړل، چې هغه د ملي اتل سره تیره کړې او هغه یې یو نرم ، صادق ، لوړ ذهن لرونکی شخص او وطن ته ژمن وباله. بیا د بهرنیو چارو وزارت ډیپلومات ښاغلي سید نبی نبیل، د ملي پخلاینې شورا مرستیال ښاغلي عطاء الرحمن سلیم او په مشرانو جرګه کې سلاکار ښاغلي مولوي عبدالخليل هر یو د موضوع په اړه خبرې وکړې. ورپسې د ملي اتل بنسټ رییس ښاغلي احمد ولی مسعود د هېواد د ملي اتل شهید احمدشاه مسعود د سیاسي، ټولنیز ، اقتصادي او فرهنګي افکارو په اړه هر اړخیزه خبرې وکړې.د غونډي په پای کې د هیواد ځوان شاعر او لیکوال ښاغلي ګل پاچا بینا، سربیره د خبرو څو ټوټې شعرونه یې ولوستل. غونډه د دعا په ویلو سره سرته ورسیده.
