په کابل کې د افغانستان لپاره د اسلامي همکاریو د سازمان ځانګړي استازي د لوړو زده کړو سرپرست وزیر سره ناسته ترسره کړه.
دغه ناسته چې د لوړو زده کړو وزارت د مقام دفتر د ناستو په تالار کې برابره شوې وه، د لوړو زده کړو سرپرست وزیر الحاج مولوي عبدالباقي حقاني، د لوړو زده کړو وزارت علمي معین دوکتور لطف الله خیرخوا، د دې وزارت ویاند مولوي خالقداد احمد تقي او د لوړو زده کړو وزارت د پلان، پالېسۍ او تقنین رئیس مفتي رضوان الله منیب او په کابل کې د افغانستان لپاره د اسلامي همکاریو د سازمان ځانګړي استازي محمد سعید آل عیاش ګډون کړی وو.
په دغه ناسته کې د لوړو زده کړو سرپرست وزیر الحاج مولوي عبدالباقي حقاني د یاد استازي له راتګه مننه وکړه او د هېواد تحصیلي برخې د پیاوړتیا، د دولتي پوهنتونونو استادانو ته د معاش لوړوالي ، د محصلینو لپاره د جلا پوهنتونونو او ټرانسپورټ زمینې برابرولو، استادانو او محصلینو ته د سکالر شیپونو ورکړې، د اسلامي هېوادونو استادانو ته د راتګ او یا انلاین تدریس زمینې برابرولو، د هېواد په پوهنتونونو کې د عربي ژبې ډېپارټمنټونو جوړولو، د پوهنتونونو نېمګړو تعمیراتو چارو بشپړولو، له افغان نړیوال پوهنتون سره بېلابېلو برخو کې د مرستې، د څېړنیز مرکز جوړولو او دیني کتابونو ورکړې برخو کې د همکارۍ غوښتنه وکړه.
ورپسې په کابل کې د افغانستان لپاره د اسلامي همکاریو د سازمان ځانګړي استازي محمد سعید آل عیاش په افغانستان کې د ا.ا.ا پر حاکمیت خوښي څرګنده کړه او د لوړو زده کړو سرپرست وزیر له لوري د شریکو شویو غوښتنو په برخو کې یې د همکاري ډاډ څرګند کړ.
دغه راز نوموړي د لوړو زده کړو وزارت او یاد سازمان ترمنځ د ګډ پلاوي پر جوړېدو، د ستونزو لیست ، د دوکتورا لرونکو کادري استادانو شهرت لیست چمتو کولو او دوی ته سپارلو غوښتنه وکړه، چې د لوړو زده کړو سرپرست وزیر دوی ته ددې برخو تنظیمولو او ورسپارلو ژمنه وکړه.
د ناستې په وروستیو کې د لوړو زده کړو سرپرست وزیر په غوښتنه یاد استازی د دیني جامعاتو او تخصصاتو چارو لوی ریاست څخه لېدنه وکړه، ددې ریاست په جوړېدو یې خوښي څرګنده او د هر اړخېزې همکارۍ ژمنه یې وکړه.
