لوړو زده کړو وزارت د علمي چارو څارنې او ارزونې ریاست پلاوي د کابل ښوونې او روزنې پوهنتون د نه ګوني پوهنځیو او علمي چارو معاونیت ادارو له اکاډمیکو چارو څخه ارزونه وکړه!
چهارشنبې ورځ د ۱۹/١٠/١٤٠٣ ه.ش چې ۷/٧/١٤٤٦ ه.ق نېټې سره سمون لري د لوړو زده کړو وزارت علمي چارو څارنې او ارزونې ریاست پلاوي د کابل ښوونې او روزنې پوهنتون د نه ګوني پوهنځیو او علمي چارو معاونیت ادارو له اکاډمیکو چارو څخه ارزونه وکړه.
په پیل کې، د کابل ښوونې او روزنې پوهنتون علمي چارو مرستیال پوهنمل دوکتور قدرت الله"عمرخیل" خپلو خبرو کې د ښه راغلاست ترڅنګ، راغلو پلاوو ته د پوهنتون د نه ګوني پوهنځیو رئیسانو پېژندګلوي وکړه او د علمي چارو معاونیت اداراتو اړوند یې هر اړخیز معلومات ورکړل، زیاته یې کړه: الحمدالله د کابل ښوونې او روزنې پوهنتون روان کال تدریسي او اکاډمیکي چارې په سمه توګه پرمخ وړل شوي دي او خوشحاله یو چې پوهنتون ته مو تشریف راوړ او د پوهنځیو او علمي چارو معاونیت اکاډمیکي چارې به له نږدې وڅېړئ، چې په دې برخه کې د علمي چارو معاونیت مسؤولین له تاسو سره پوره همکار دی.
وروسته، لوړو زده کړو وزارت علمي چارو څارنې او ارزونې ریاست مسؤولینو پوهنتون ته د راتګ موخه او هدف څرګند کړ، زیاته یې کړه: زمونږ مسؤولین به نن ورځ پوهنتون کې پاتې شي او د پوهنځیو او ماسټرۍ برنامو اکاډمیکې چارې به له نږدې وڅېړي.
